- அமின்

சித்திரைத் திங்கள் வெயிலென - என்
     சிந்தையை நோகச் செய்தவளே
நித்திரை உலகுக்கு அனுப்பாதே - என்
     நிம்மதி கெடுத்து வாட்டாதே!
பத்தரை மாற்றுத் தங்கமெனப் - பல
     பண்புகள் கொண்டு ஒளிர்ந்தவளே!
இத்தரை மீது நான்வாட - நீ
     என்னை விட்டுச் ஏன்சென்றாய்?

உலவும் தென்றல் குளிரெனவே - என்
     உள்ளச் சோலையில் பூத்தவளே!
இலவு காத்த கிளிபோலே எனை
     ஏங்க வைத்தே ஏன்சென்றாய்?
பிரிவாம் என்ற புயல்வீசி - நற்
     பாசச் சுடரை அனைத்தாயே!
சருகாய் என்றன் வாழ்வுதனைத் - தரையில்
     சரியச் செய்தே ஏன்சென்றாய்?

இதயம் வாழும்; இனியவளே - எனை
     இணைத்து வாழ்ந்திட நினைத்தவளே!
உதய மலராய்ச் சிரித்தவளே - என்
     உயிரே! ஒளியே! ஏன்சென்றாய்?
சாதியின் கொடுமை தாளாமல் - துயர்த்
     தணலில் நெஞ்சம் கொதித்திடவே
பாதியில் பிரிந்து வாடுகிறேன் - இந்தப்
     பாவிக்குப் புகலிடம் தாராயோ?